രാജ്യത്ത് താമസ, തൊഴിൽ, അതിർത്തി സുരക്ഷാ നിയമങ്ങൾ ലംഘിച്ച് കഴിയുന്നവർക്കെതിരെ പരിശോധന ശക്തമാക്കി സൗദി ആഭ്യന്തര മന്ത്രാലയം. ആഭ്യന്തര മന്ത്രാലയത്തിന്റെ നിർദ്ദേശപ്രകാരം സുരക്ഷാ സേന രാജ്യവ്യാപകമായി നടത്തിയ വ്യാപക പരിശോധനകളിൽ ഒരാഴ്ചയ്ക്കിടെ 14,542 നിയമലംഘകരാണ് പിടിയിലായത്.
അറസ്റ്റിലായവരിൽ 7,216 പേർ മതിയായ താമസരേഖകൾ (ഇഖാമ) ഇല്ലാതെ രാജ്യത്ത് തുടർന്നവരാണ്. ഇതിനുപുറമേ, അനധികൃതമായി അതിർത്തി കടക്കാൻ ശ്രമിച്ച 3,843 പേരെയും തൊഴിൽ നിയമലംഘനം നടത്തിയ 3,483 പേരെയും സുരക്ഷാസേന പിടികൂടി. രാജ്യത്തേക്ക് നിയമവിരുദ്ധമായി പ്രവേശിക്കാൻ ശ്രമിച്ച 1,457 പേരും പിടിയിലായവരിൽ ഉൾപ്പെടുന്നു. നിയമലംഘകർക്ക് യാത്രാസൗകര്യമൊരുക്കുകയോ താമസിക്കാൻ ഇടം നൽകുകയോ ചെയ്ത 22 പേരും അറസ്റ്റിലായിട്ടുണ്ട്. പിടിയിലായവർക്കെതിരെയുള്ള നിയമനടപടികൾ പൂർത്തിയാക്കി ഇവരെ ഉടൻതന്നെ നാടുകടത്തുമെന്ന് അധികൃതർ വ്യക്തമാക്കി.
രാജ്യത്തുള്ള എല്ലാ പ്രവാസികളും താമസ-തൊഴിൽ നിയമങ്ങൾ കൃത്യമായി പാലിക്കണമെന്ന് ആഭ്യന്തര മന്ത്രാലയം ആവർത്തിച്ച് ആവശ്യപ്പെട്ടു. നിയമലംഘകർക്ക് സഹായം നൽകുന്നവർക്കെതിരെ കടുത്ത ശിക്ഷാനടപടികളുണ്ടാകുമെന്ന് മന്ത്രാലയം ശക്തമായ മുന്നറിയിപ്പ് നൽകി. ഇത്തരക്കാർക്ക് 15 വർഷം വരെ തടവും 10 ലക്ഷം റിയാൽ വരെ പിഴയുമാണ് ശിക്ഷ. കൂടാതെ ഇവർ കുറ്റകൃത്യത്തിന് ഉപയോഗിച്ച വാഹനങ്ങളും സ്വത്തുക്കളും കണ്ടുകെട്ടുകയും ചെയ്യും.
നിയമലംഘനങ്ങളെക്കുറിച്ചുള്ള വിവരങ്ങൾ ലഭിക്കുന്നവർ അത് ഉടനടി അധികൃതർക്ക് കൈമാറണമെന്ന് ആഭ്യന്തര മന്ത്രാലയം പൊതുജനങ്ങളോട് അഭ്യർത്ഥിച്ചു. മന്ത്രാലയത്തിന്റെ ഔദ്യോഗിക വെബ്സൈറ്റ് വഴിയോ ടോൾ ഫ്രീ നമ്പറുകൾ വഴിയോ വിവരങ്ങൾ അറിയിക്കാവുന്നതാണ്. വരും ദിവസങ്ങളിലും പരിശോധനകൾ കൂടുതൽ ശക്തമായി തുടരുമെന്ന് സുരക്ഷാ വിഭാഗം മുന്നറിയിപ്പ് നൽകി.
Content Highlights: Saudi authorities have intensified enforcement against residency, labour and border-related violations, with more than 14,500 expatriates reportedly arrested during a one-week period.